กำสอนบ่าเก่า สุภาษิตกำเมือง

HANGMAN
เตรียมอนุบาล

ออฟไลน์

กระทู้: 82

« เมื่อ: วันที่ 13 ธันวาคม 2010, 15:08:46 »

งัวตั๋วใด กิ๋นหญ้าแผกหมู่ กันว่าบ่าต๋ายเปิ้นฆ่า ก่า ต๋ายเสือขบ
คนโบราณเปิ้นสอนไว้ หมายถึงคนตี้มีพฤติก๋รรมแตกต่างจากคนอื่น บ่าเข้าเปื้อนเข้าฝูง เป๋นคนโดดเดี่ยว เมื่อมีปั๋ญหาเกิดขึ้นกับตั๋ว ตี้บ่าสามารถแก้ไขได้ ก่า จะได้ฮับความเดือดฮ้อนแสนสาหัส บ่ามีไผจ้วยเหลือ

เมื่อป้อแม่มี กิ๋นขว้างโบ๊ะขว้างบ๊ะ กันป้อแม่ต๋ายละ เป๋นหมะห่อยหมะนอย
กำอู้นี้ก่ะเป๋นกำอู้ตี้มองข้ามบ่าได้ แต่จะโต้ษลูกอย่างเดวก่าบ่าได้ เพราะเวลาป้อแม่ยังมีอยู่ ความฮักลูก กอยดูแลลูกจ๋นบ่าได้จ้วยตั๋วเก่าเลย แล้วปอป้อแม่ต๋าย บ่ามีไผผ่อกอยดูแล เลยจ้วยตั๋วเก่าบ่าได้ บ่าว่าก๋านเป๋นอยู่ กาว่าก๋านเยียะก๋าน เซาะว่าหากิ๋น บ่าจ้างทั้งนั้น ปอเงินเก่าตี้ป้อแม่หาไว้หื้อหมด ก่า เป๋นบ่าห่อยบ่านอย หรือบ่าห่อยนอยจา อย่างว่า

เสียมบ่า คม หื้อใส่ด้ามหนักๆ ความฮู้บ่านักหื้อหมั่นฮ่ำหมั่นเฮียน
เป๋นจาไดพ่อง กำคนเฒ่าเปิ้นว่าไว้ เฮาเถียงบ่าได้น่อเจ้า เป๋นกำตี้เปิ้นเตื๋อนไว้ หยั่งป้าฮู้น่อยต้องหมั่นเฮียนหมั่นฝึก แต่อย่างว่า ได้หน้าลืมหลังสะลวด เฮ้อ

ของกิ๋นลำ อยู่ตี้คนมัก ของฮัก อยู่ตี้คนเปิงใจ๋
เปิ้นอู้ของเปิ้นไว้ดีนาเจ้า อ้ายหมู่เฮาคนเมือง เปิ้นมักลาบ แต่ลองเอาไปหื้อน้องอ้อย เปิ้นก่า ตึงบ่ากิ๋น เปิ้นบ่ามัก เอามาแลกผักกับน้ำพริกของเปิ้นก่า คงบ่าเอา

ของฮัก อยู่ตี้คนเปิงใจ๋ ก่า แต๊แห๋ม กอนบ่าอั้นก่า คงจะบ่ามีของร้อยแปดปันเก้ามาวางขาย หื้อเลือก คนนั้นว่า อันนี้งาม คนนี้ก่า เปิงใจ๋อันนั้น มันตึงเป๋นจะนี้นา

กำอู้เข้าหู จะไปถูออกปาก จักยากใจ๋ปายลูน
คนบ่าเก่าเปิ้นสอนนักสอนหนา เรื่องตี้เฮาได้ยินกำอู้ บ่าถูกใจ๋ จะไปฟั่งโต้ตอบโดยบ่าได้ตั้งสติ กึ้ดหื้อดีก่อน

มันจะเป๋นเรื่องเป๋นราวไปใหญ่ บางเตื้อก่า เป๋นเรื่องเข้าใจ๋ผิดเพราะหูเฮาหาเรื่องแต๊ ๆจะแก้ไขยากกำลูน บางทีก่า เสียเปื้อนไปเลย เพราะมันสะแม๊งใจ๋กั๋นไปเหียละ

มีนึ่งแล้วจะแอมแถมสอง ขี่เฮือน้ำนองซ้อนสองจั้งล่ม
กำบ่าเก่าเปิ้นว่าไว้จ๊าดดีเน้าะเจ้า เตื๋อนใจ๋หมู่เฮา คนตี้ซอบผ่อสาว ๆ งาม ๆ ถ้ายังบ่ามี๋ไผอยู่แอมข้างก่า แล้วไป
แต่ถ้าตั๋วเก่าเฮามีแล้วคนนึ่ง ก่า จะไปเซาะผ่อตังอื่นแห๋ม กำเดวจะเป๋น ขี่เฮือน้ำนอง ซ้อนสอง กะเดวมันจะล่มเน่อเจ้า

เปิ้นบ่าถาม จะไปกล่าว เปิ้นบ่าป่าว จะไปไป
กำบ่าเก่าเปิ้นว่าไว้จะอี้ แต่วันนี้เฮาชักจะกั๋งขา เพราะป้าตั้งใจ๋ป่าวประกาศ ทีแรกก่
จะมีไผ ๆ ปากั๋นมา
แต่เอาแต๊ ๆ แล้ว ก่ หมะมากั๋นเหียซื่อ ๆ หยั่งอั้นแหละ แล้วจะหมะฮื่อป้ากั๋งขาจะได
ก่ ต้องปิ้กมาผ่อตั๋วเก่า อาจจะมีอะหยังตี้เยียะฮื่อเปิ้นเปลี่ยนใจ๋เจ้า

ใจ๋บ่ แข็ง บ่ ได้ขี่จ๊างงา ใจ๋บ่ กล้า บ่ ได้เป๋นป้อเลี้ยง
เปิ้นสอนฮื่อเป๋นคนเก่งคนกล้า แต่ต้องเป๋นไปในตางตี้ถูก บ่าไจ้หื้อเป๋นนักเลงอันธพาลนาเจ้า

หันเปิ้นมี จะไปไค่ได้ หันเปิ้นยากไร้ จะไปดูแควน
เปิ้นสอนหื้อมีใจ๋เป๋นก๋าง หันเปิ้นมี จะไปขอย กาว่าอยากได้ของเปิ้น และถ้าหันคนยากคนจ๋น ก่า จะไปดูแควนเปิ้น บางครั้งบางเตื้อ คนตี้เฮาดูหมิ่นดูแควน ก่า อาจจะได้ดิบได้ดีซักวันนึ่งก่า ได้


	IP : บันทึกการเข้า

เมรัย มัจจุราช
ผู้ดูแลบอร์ด
ระดับ :ป.โท

ออฟไลน์

กระทู้: 3,515

"คนโง่" คือคนที่ "ไม่รู้" ว่าตัวเอง "ไม่รู้"